ICHOT ¹ a burde ^1b in boure bryht,^1c
   That fully semly is on syht,²
Menskful ³ maiden of myht;
   Feir ⁴ ant fre to fonde; ⁵
In al this wurhliche ⁶ won ⁷
A burde of blod ant of bon
Never yete y nuste ⁸ non
   Lussomore in londe ⁹ .
       Blow northerne wynd!
      Send thou me my suetyng! ¹⁰
       Blow northerne wynd! blow, blow, blow!

With lokkes lefliche ¹¹ ant longe,
With frount ant face feir to fonge, ¹²
With murthes ¹³ monie mote heo monge, ¹⁴
   That brid ¹⁵ so breme ¹⁶ in boure.
With lossom^16b eye grete ant gode,
With browen blysfol under hode,
He that reste him on the rode, ¹⁷
   That leflych lyf honoure.
     Blow northerne wynd, etc.

Hire lure ¹⁸ lumes ¹⁹ liht,
Ase a launterne a-nyht,
Hire bleo ²⁰ blykyeth so bryht,
   So feyr heo is ant fyn.
A suetly swyre ²¹ heo ²² hath to holde,
With armes, shuldre ase mon wolde,
Ant fingres feyre for to folde,
   God wolde hue were myn!
       Blow northerne wynd, etc.

Heo is coral of godnesse,
Heo is rubie of ryhtfulnesse,
Heo is cristal of clannesse, ²³
   Ant baner of bealté.
Heo is lilie of largesse,
Heo is parvenke ²⁴ of prouesse,
Heo is solsecle ²⁵ of suetnesse,
   Ant lady of lealté.^25b

For hire love y carke²⁶ ant care,
For hire love y droupne ant dare, ^26b
For hire love my blisse is bare
   Ant al ich waxe won. ²⁷
For hire love in slep y slake,²⁸
For hire love al nyht ich wake,
For hire love mournynge y make
   More then eny mon.
     Blow northerne wynd!
     Send thou me my suetyng!
     Blow northerne wynd! blou, blou, blou!